ಈ ಪಾಸ್ ಪೋರ್ಟ್, ವೀಸಾ ಫ್ರೀ ಟ್ರಿಪ್ ಹೋದಾಗ sightseeing -ಏನೆಲ್ಲ ನೋಡಬಹುದು!!
ಎನ್. ಕಾರ್ತಿಕ್ ಕೌಂಡಿನ್ಯ
ಸಾಮಾನ್ಯವಾಗಿ “ಸಿಂಗಾಪುರಕ್ಕೆ ಹೋಗ್ತಿದ್ದೇನೆ” ಎಂದರೆ ಪಾಸ್ಪೋರ್ಟ್, ವೀಸಾ, ವಿಮಾನ ಪ್ರಯಾಣ—all set ಅಂತಲೇ ಅರ್ಥ. ಆದರೆ ಶಿವಮೊಗ್ಗ ಜಿಲ್ಲೆಯವರಿಗೆ ಇದೀಗ ನಗು ತರಿಸುವ ಜೊತೆಗೆ ಅಚ್ಚರಿ ಮೂಡಿಸುವ ಒಂದು ವಿಶಿಷ್ಟ ಸಂಗತಿ ಬೆಳಕಿಗೆ ಬಂದಿದೆ.
ಹೌದು, ಪಾಸ್ಪೋರ್ಟ್ ಇಲ್ಲದೇ, ವೀಸಾ ಇಲ್ಲದೇ ಸಿಂಗಾಪುರಕ್ಕೆ ಹೋಗಿ ಬರಬಹುದು!
ಇದು ವಿದೇಶಿ ಪ್ರವಾಸದ ಸುದ್ದಿ ಅಲ್ಲ. ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಜಯನಗರ ಮತ್ತು ರಾಮಚಂದಾಪುರಮಠ ವ್ಯಾಪ್ತಿಯಲ್ಲಿ ಇರುವ ‘ಸಿಂಗಾಪುರ’ ಎಂಬ ಹೆಸರಿನ ಸ್ಥಳ ಇದೀಗ ಜನರ ಗಮನ ಸೆಳೆಯುತ್ತಿದೆ. ಹೆಸರೇ ಅಂತರಾಷ್ಟ್ರೀಯ ಮಟ್ಟದಂತೆ ಇರುವುದರಿಂದ ಈ ಊರು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ.ಹೊಸನಗರ ತಾಲೂಕಿನ ಗ್ರಾಮೀಣ ಪ್ರದೇಶದಲ್ಲಿರುವ ಈ ‘ಸಿಂಗಾಪುರ’ಕ್ಕೆ ಹೋಗಲು ಯಾವುದೇ ಸರ್ಕಾರಿ ದಾಖಲೆಗಳ ಅಗತ್ಯವಿಲ್ಲ. ವಿಮಾನ ಟಿಕೆಟ್, ಪಾಸ್ಪೋರ್ಟ್, ವೀಸಾ-ಯಾವುದೂ ಬೇಡ. ಸಾಮಾನ್ಯ ರಸ್ತೆ ಮಾರ್ಗದ ಮೂಲಕವೇ ಈ ಸಿಂಗಾಪುರ ತಲುಪಬಹುದು. ಆದರೆ ಹೆಸರು ಕೇಳಿದವರಿಗಂತೂ ಇದು ಕ್ಷಣಕಾಲ ವಿದೇಶಿ ಪ್ರವಾಸದ ಭಾವನೆ ಮೂಡಿಸುವಂತಿದೆ.
ಈ ಸಿಂಗಾಪುರಕ್ಕೆ ಹೋದಾಗ ಹತ್ತಿರದಲ್ಲಿರುವ ಸ್ಥಳಗಳಿಗೆ ಭೇಟಿ ನೀಡಿ.
ಅರಸಾಳು ಮಾಲ್ಗುಡಿ ಮ್ಯೂಸಿಯಂ, ಗುಳಿಗುಳಿ ಶಂಕರ, ಹುಂಚ ಜೈನ ಮಠ, ಇತಿಹಾಸ ಪ್ರಸಿದ್ಧ ಕೋಡೂರು ಶಂಕರೇಶ್ವರ ದೇವಸ್ಥಾನ ಶ್ರೀ ರಾಮಚಂದ್ರಪುರ ಮಠ, ಗೋಶಾಲೆ, ಶ್ರೀ ಚಂದ್ರಮೌಳೇಶ್ವರ ದೇವಸ್ಥಾನ, ಅಲ್ಲೇ ಹತ್ತಿರದ ಫಾಲ್ಸ್ ಉಂಟು, ಕಾರಣಗಿರಿ ಸಿದ್ದಿ ವಿನಾಯಕ ದೇವಸ್ಥಾನ, ಬಿದನೂರು ಕೋಟೆ, ಬರೆಕಲ್ ಬತ್ತೇರಿ, ದೇವಗಂಗೆ, ಕೊಡಚಾದ್ರಿ, ಹುಲಿಕಲ್ ಲಕ್ಷ್ಮಿ ನರಸಿಂಹ ದೇವಸ್ಥಾನ, ಬಾಳೆ ಬರೆ ಫಾಲ್ಸ್, ಸಾವೇಹಕ್ಲು, ಯಡೂರು ಅಬ್ಬಿ ಫಾಲ್ಸ್, ಕವಲೇ ದುರ್ಗ.
ಈ ಹೆಸರು ಸಾರ್ವಜನಿಕರಲ್ಲಿ ಕುತೂಹಲ ಹುಟ್ಟಿಸಿದೆ. “ನಾನು ಸಿಂಗಾಪುರಕ್ಕೆ ಹೋಗಿ ಬಂದೆ” ಎಂದು ಹೇಳಿದರೆ ಕೇಳುವವರು ಮೊದಲು ಅಚ್ಚರಿಗೊಳಗಾಗುತ್ತಾರೆ. ನಂತರ ಇದು ಶಿವಮೊಗ್ಗ ಜಿಲ್ಲೆಯಲ್ಲೇ ಇರುವ ಸ್ಥಳ ಎಂದು ತಿಳಿದಾಗ ನಗು ಮೂಡುವುದು ಸಹಜ. ಇದೇ ಕಾರಣಕ್ಕೆ ಈ ಸುದ್ದಿ ವಾಟ್ಸಾಪ್, ಫೇಸ್ಬುಕ್ ಹಾಗೂ ಇನ್ಸ್ಟಾಗ್ರಾಂನಲ್ಲಿ ಹಾಸ್ಯಮಯವಾಗಿ ವೈರಲ್ ಆಗುತ್ತಿದೆ. ಗ್ರಾಮದ ಹೆಸರು ಮಾತ್ರ ವಿದೇಶದಂತಿದ್ದರೂ, ಇದು ಸ್ಥಳೀಯ ಜನರ ದಿನನಿತ್ಯದ ಬದುಕಿನ ಭಾಗವೇ. ಆದರೂ ಈ ವಿಶಿಷ್ಟ ಹೆಸರು ಮುಂದಿನ ದಿನಗಳಲ್ಲಿ ಪ್ರವಾಸಿಗರ ಕುತೂಹಲಕ್ಕೂ ಕಾರಣವಾಗುವ ಸಾಧ್ಯತೆ ಇದೆ. ಸೆಲ್ಫಿ ತೆಗೆದುಕೊಳ್ಳಲು, ಹಾಸ್ಯ ವಿಡಿಯೋ ಮಾಡಲು, “ಸಿಂಗಾಪುರ ನೋಡಿದ ಅನುಭವ” ಹಂಚಿಕೊಳ್ಳಲು ಈ ಸ್ಥಳ ಹೊಸ ಆಕರ್ಷಣೆಯಾಗುತ್ತಿದೆ. ವಿದೇಶಿ ಸಿಂಗಾಪುರ ನೋಡೋದು ಎಲ್ಲರಿಗೂ ಸಾಧ್ಯವಾಗದೇ ಇರಬಹುದು. ಆದರೆ ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಈ ‘ಸಿಂಗಾಪುರ’ವನ್ನು ನೋಡೋದು ಎಲ್ಲರಿಗೂ ಸಾಧ್ಯ. ಪಾಸ್ಪೋರ್ಟ್ ಇಲ್ಲದೇ ಸಿಂಗಾಪುರ ಪ್ರವಾಸ ಅನ್ನೋ ಮಾತು ಇಲ್ಲಿಗೆ ಬಂದಾಗ ಅರ್ಥಪೂರ್ಣವಾಗುತ್ತದೆ.
ಒಟ್ಟಿನಲ್ಲಿ, ಹೆಸರಿನ ವೈಶಿಷ್ಟ್ಯದಿಂದಲೇ ಜನರ ಗಮನ ಸೆಳೆದಿರುವ ಈ ಸಿಂಗಾಪುರ, ಶಿವಮೊಗ್ಗ ಜಿಲ್ಲೆಯ ಮತ್ತೊಂದು ಕುತೂಹಲಕರ ವಿಷಯವಾಗಿ ಹೊರಹೊಮ್ಮಿದೆ.
Leave a Reply