ಸಮಾಜದ ಸರ್ವತೋಮುಖ ಏಳಿಗೆಗೆ ಒಗ್ಗಟ್ಟು ಅನಿವಾರ್ಯ: ಶಶಿಧರ್ ನಾಯ್ಕ್ ಕರೆ
ಹೊಸನಗರ: ಸಮಾಜದ ಸರ್ವತೋಮುಖ ಅಭಿವೃದ್ಧಿಗೆ ಕೋಟೆಗಾರ್ ವಿದ್ಯಾವರ್ಧಕ ಸಂಘವು ನಿರಂತರವಾಗಿ ಶ್ರಮಿಸುತ್ತಿದ್ದು, ಸಂಘಟನೆಯ ಏಳಿಗೆಗಾಗಿ ಸಮಾಜ ಬಾಂಧವರು ಒಂದಾಗಿ, ಜೊತೆಯಾಗಿ ಕೈಜೋಡಿಸಬೇಕೆಂದು ವಿಶ್ವ ರಾಮಕ್ಷತ್ರಿಯ ಸಂಘ ಹಾಗೂ ತಾಲೂಕು ಕೋಟೆಗಾರ್ ವಿದ್ಯಾವರ್ಧಕ ಸಂಘದ ಅಧ್ಯಕ್ಷ ಶಶಿಧರ್ ನಾಯ್ಕ್ ಹೇಳಿದರು.
ಪಟ್ಟಣದ ಶ್ರೀ ಸೀತಾರಾಮಚಂದ್ರ ಸಭಾಭವನದ ಆವರಣದಲ್ಲಿ ಆಯೋಜಿಸಲಾಗಿದ್ದ ೧೧ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವ ಸಭಾ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
೨೦೧೬ರಿಂದ ಆರಂಭಗೊಂಡ ಈ ಉತ್ಸವವು ಪ್ರಸ್ತುತ ಯಶಸ್ವಿಯಾಗಿ ಮುನ್ನಡೆಯುತ್ತಿದ್ದು, ಪ್ರತಿ ವರ್ಷ ೫ ದಿನಗಳ ಕಾಲ ಸಾರ್ವಜನಿಕ ಅನ್ನಸಂತರ್ಪಣೆ, ಗಣಹೋಮ, ರಂಗಪೂಜೆ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಜರುಗುತ್ತಿವೆ. ಇದರೊಂದಿಗೆ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಬಾಂಧವ್ಯ ಗಟ್ಟಿಗೊಳಿಸಲು ಶ್ರಾವಣ ಮಾಸದಲ್ಲಿ ಉಪಾಕರ್ಮ, ವರಮಹಾಲಕ್ಷ್ಮೀ ವ್ರತ, ನವರಾತ್ರಿಯಲ್ಲಿ ಚಂಡಿಕಾ ಹೋಮ, ಕಾರ್ತಿಕ ಮಾಸದಲ್ಲಿ ತುಳಸಿ ಆರಾಧನೆ, ರಾಮತಾರಕ ಜಪ ಮತ್ತು ಯುವಕ ಸಂಘದಿಂದ ಶ್ರೀರಾಮ ವಸಂತ ಪೂಜೆ ಹಾಗೂ ಸತ್ಯನಾರಾಯಣ ವ್ರತಗಳನ್ನು ಶ್ರದ್ಧಾ-ಭಕ್ತಿಗಳಿಂದ ಆಚರಿಸಿಕೊಂಡು ಬರಲಾಗುತ್ತಿದೆ ಎಂದರು.
ಸಾಮಾಜಿಕ ಕಳಕಳಿಯ ಸೇವಾ ಯೋಜನೆಗಳು
ಸಂಘವು ಕೇವಲ ಧಾರ್ಮಿಕ ಚಟುವಟಿಕೆಗಳಿಗೆ ಸೀಮಿತವಾಗದೆ ಹತ್ತು ಹಲವು ಜನಪರ ಕಾರ್ಯಕ್ರಮಗಳನ್ನು ರೂಪಿಸಿದೆ:
* ವಿದ್ಯಾನಿಧಿ ಯೋಜನೆ: ೨೦೧೫-೧೬ರಲ್ಲಿ ಆರಂಭಗೊಂಡ ಈ ಯೋಜನೆಯಡಿ ಪ್ರತಿಭಾ ಪುರಸ್ಕಾರ ನೀಡಲಾಗುತ್ತಿದ್ದು, ಎಸ್‌ಎಸ್‌ಎಲ್‌ಸಿ, ಪಿಯುಸಿ ಹಾಗೂ ಪದವಿ ಪರೀಕ್ಷೆಗಳಲ್ಲಿ ಗರಿಷ್ಠ ಅಂಕ ಗಳಿಸಿದ ಸಮಾಜದ ವಿದ್ಯಾರ್ಥಿಗಳಿಗೆ ಸನ್ಮಾನಿಸಿ ನಗದು ಪುರಸ್ಕಾರ ನೀಡಲಾಗುತ್ತಿದೆ.
* ಆರೋಗ್ಯ ನಿಧಿ ಹಾಗೂ ಪಿಂಚಣಿ: ಆರ್ಥಿಕ ಸಂಕಷ್ಟದಲ್ಲಿರುವ ಬಡ ಕುಟುಂಬಗಳಿಗೆ, ಗಂಭೀರ ಕಾಯಿಲೆಗಳಿಂದ ಬಳಲುತ್ತಿರುವವರಿಗೆ ಧನಸಹಾಯ ಮತ್ತು ಅಸಹಾಯಕ ನಿರ್ಗತಿಕ ಮಹಿಳೆಯರಿಗೆ ಮಾಸಿಕ ವಿಧವಾ ವೇತನ ನೀಡಲಾಗುತ್ತಿದೆ.
* ಕ್ರೀಡಾ ಪ್ರೋತ್ಸಾಹ: ಯುವಕ-ಯುವತಿಯರು ಹಾಗೂ ಮಹಿಳೆಯರ ಪ್ರತಿಭೆಯನ್ನು ಪ್ರೋತ್ಸಾಹಿಸಲು ತಾಲೂಕು ಮತ್ತು ರಾಜ್ಯ ಮಟ್ಟದ ಕ್ರೀಡಾಕೂಟಗಳಲ್ಲಿ ಭಾಗವಹಿಸಲು ನೆರವು ನೀಡಲಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ವಿಸ್ತಾರವಾದ ಸಮಾಜಮುಖಿ ಸೇವೆಗಳನ್ನು ಹಮ್ಮಿಕೊಳ್ಳಲಾಗುವುದು ಎಂದು ತಿಳಿಸಿದರು.
ಇದೇ ಸಂದರ್ಭದಲ್ಲಿ ಬೈಂದೂರು ಶ್ರೀ ರಾಮ ವಿವಿಧೋದ್ದೇಶ ಟ್ರಸ್ಟ್ ಅಧ್ಯಕ್ಷ ಬಿ. ರಾಮಕೃಷ್ಣ ಶೇರೆಗಾರ್ ಅವರು ‘ಶ್ರೀರಾಮರಕ್ಷಾ ಚಾರಿಟೇಬಲ್ ಟ್ರಸ್ಟ್’ ಅನ್ನು ಉದ್ಘಾಟಿಸಿದರು. ಕೋಟೇಶ್ವರ ಕಲ್ಪತರು ಸಂಸ್ಥೆಯ ಮಾಲೀಕ ಚಂದ್ರಶೇಖರ್ ವಿದ್ಯಾನಿಧಿ ಪುರಸ್ಕಾರವನ್ನು, ಉದ್ಯಮಿ ಸತೀಶ್ ಎನ್. ಶೇರೆಗಾರ್ ವಿಧವಾ ವೇತನವನ್ನು ಹಾಗೂ ಕುಂದಾಪುರ ರಕ್ಷಾ ಚಾರಿಟೇಬಲ್ ಟ್ರಸ್ಟ್ ಅಧ್ಯಕ್ಷ ಅತೀಶ್ ಬೆಟ್ಟಿನ್ ಆರೋಗ್ಯ ನಿಧಿ ನೆರವನ್ನು ಅರ್ಹ ಫಲಾನುಭವಿಗಳಿಗೆ ವಿತರಿಸಿದರು.
ಕಾರ್ಯಕ್ರಮದಲ್ಲಿ ಸಂಘದ ಗೌರವಾಧ್ಯಕ್ಷ ಪಿ.ಆರ್. ಸಂಜೀವ, ಗುತ್ತಿಗೆದಾರ ಹೆಚ್.ವಿ. ಮಹಾಬಲ, ಡಾ. ಬಿ.ಎನ್. ದಿನಮಣಿ, ಹೆಚ್. ಶ್ರೀನಿವಾಸ್, ಗೋವಿಂದರಾಯ್, ದ್ಯಾವರ್ಸ ಸುಬ್ರಹ್ಮಣ್ಯ, ಕೋಡಿ ಶೇಖರಣ್ಣ, ವಿಠೋಬಾ ನಾಯ್ಕ, ಬೃಂದಾವನ ಪ್ರವೀಣ, ಕೆ.ಜಿ. ನಾಗೇಶ, ಪಿ. ಮನೋಹರ, ಅನಿಲ್‌ಕುಮಾರ್, ಮಾಧವ, ಏಜೆಂಟ್ ನಾಗರಾಜ್, ಮಂಜುನಾಥ, ಮಾವಿನಕೊಪ್ಪ ಗಣೇಶ, ಎಂ.ಪಿ.ಎನ್. ಸತ್ಯನಾರಾಯಣ, ಗೋವಿಂದರಾಜು, ಹೆಚ್.ಎಂ. ನಿತ್ಯಾನಂದ, ಮಾವಿನಕೊಪ್ಪ ಸತೀಶ, ಸುವರ್ಣ, ಹೆಚ್.ಎಸ್. ಮಂಜುನಾಥ, ಸಂಜೀವ, ರಾಘವೇಂದ್ರ, ಅರುಣ, ಶ್ರೀದೇವಿ, ಹನುಮಂತ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.
ಸೆಪ್ಟೆಂಬರ್ 18ರ ಶುಕ್ರವಾರ ಬೆಳಿಗ್ಗೆ ಗಣಹೋಮ, ಮೂಡಗಣಪತಿ ಪೂಜೆ, ಮಹಾಮಂಗಳಾರತಿ, ತೀರ್ಥ-ಪ್ರಸಾದ ವಿನಿಯೋಗ ಹಾಗೂ ಮಧ್ಯಾಹ್ನ ೧ ಗಂಟೆಗೆ ಸಾರ್ವಜನಿಕ ಮಹಾ ಅನ್ನಸಂತರ್ಪಣೆ ನಡೆಯಲಿದೆ. ಸಂಜೆ ೪ ಗಂಟೆಗೆ ಕೋಟೆಗಾರ್ ಮಹಿಳಾ ಮಂಡಳಿಯವರಿಂದ ಆಕರ್ಷಕ ಡೊಳ್ಳು ಕುಣಿತ ಹಾಗೂ ಹೆಬ್ರಿಯ ಸ್ವಸ್ತಿಕ್ ಚಂಡೆ ಬಳಗದ ವಾದನದೊಂದಿಗೆ ಬೆಳ್ಳಿ ರಥದಲ್ಲಿ ಶ್ರೀ ದೇವರ ಭವ್ಯ ರಾಜಬೀದಿ ಶೋಭಾಯಾತ್ರೆ ಜರುಗಲಿದ್ದು, ಬಳಿಕ ಶರಾವತಿ ಹಿನ್ನೀರಿನಲ್ಲಿ ಮೂರ್ತಿ ವಿಸರ್ಜನೆ ನೆರವೇರಲಿದೆ. ಈ ಧಾರ್ಮಿಕ ಮಹೋತ್ಸವದಲ್ಲಿ ಭಕ್ತಾದಿಗಳು ಹಾಗೂ ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಸಂಘದ ಅಧ್ಯಕ್ಷ ಶಶಿಧರ್ ನಾಯ್ಕ್ ಕೋರಿದ್ದಾರೆ.
Leave a Reply